UNTUK MENCARI PUISI-PUISIMU CUKUP KETIK NAMAMU DI KOLOM "SEARCH" LALU "ENTER" MAKA SELURUH PUISIMU AKAN TAMPIL DI SINI

Kamis, 17 November 2011

PERLAJANG MENTAS


Lenga terbegi tekuak manok sekali
enggo berkat ari si perlanja sira ndube
ngencuah medalit dalan kukepar deleng meganjang
... erderit derit sora buluh kembaren rincet incet
la meteh melihe, la inget nembe nembe
piah nggo ka bincar matawari ngelegi bana
tapi kuta simantandangen lenga teridah pulo pulo na
lakin lah nggo papak nahe jingkangken bana
sebab lanai sentudu ukur ras pusuh peraten,
ngarak ngarak kinigeluhen muat kulawes ndube kuperlajangen...
andiko risona e, andiko melengetna e
lanai bo siat pusuh ngalo ngalo perbebenna,
siayak ayaken kiniseran nampilken bana,
bagem kute bekas bapa muham mergana erbahan dalan
bagem kute bekas nande beru karo pepiher tendi ras kula
to dalanken nakku, to berkatken, nindu nge ndube
o nande beru karo, o bapa muham simanteki kuta susuk,tambak simbelang
olanai tulihkendu kuberneh, jingkangkenlah nahendu
olanai tatapndu kupudi, tadingkenlah awihndu...
gundari enggo kami suh kuta kepar nande,
mbole mbole matawari enggo kami suh bas kuta mbaru bapa,
kai nari dage deba tabas tabasndu, gelah njujuri segelah Dibata
lanai tuhu lit si la mehangke nande, kerina perlanja sira jadi juak juak kami..
tapi gundari enggo peren dalin kupusuh peraten,
danga danga perukuren anak singuda,
lanai tandaina sembuyak seninana,
perbahan akapna ban beluhna maka meganjang uruk inganna tedis,
lupakenna urat sipeteguh ia, tadingkenna aron sipesikap jumana...
kuga denga nge ningku bandu o nande beru karo, bapa muham la megogo
bas bara tentenmu e doah didongken senina turangmu e, nindu kal marenda
salahkal aku nande, lepak kal aku bapa, retap kepe ndube rakut sipitu
perban lanai aku ngasub petalu talu ukur kubaba,
andiko, kuga denga nge ningku nuri nuri bandu duana
mambur iluh erdire dire, getem pusuh lanai ertembe..
tatapndu min permerap perukuren kami e o nande, o bapa
perbahan la beloh anak sintengah nami nami ukur,
anakndu singerentes dalan kerangen sigelap ndube,enggo lolah
perpusuh ka, seh kal risona......

----Oleh Drs Mustahari Sembiring.----
----Makassar, 17 Nopember 2011. turi turin aron sipitu sada dalanen.---
----* dalam bahasa ibu,suku karo sehari hari.......

Tidak ada komentar:

Posting Komentar